காலனியத்துக்குப் பிந்தைய இந்தியாவின் மறுகட்டமைப்பு - பாடக் குறிப்புகள்

பாடச் சுருக்கம்

காலனித்துவ ஆட்சியிலிருந்து கிடைத்த விடுதலைக்கு இந்தியா ஒரு விலை கொடுக்க வேண்டியிருந்தது. இந்தியப் பிரிவினை வங்காளம், பஞ்சாப் மாகாணங்களைப் பிரித்தது; இடப்பெயர்வும் வகுப்புவாத வன்முறையும் ஏற்பட்டன. சமயச்சார்பற்ற மக்களாட்சி அரசமைப்பை உருவாக்குதல், 500க்கும் மேற்பட்ட சுதேச அரசுகளை ஒருங்கிணைத்தல், மொழி அடிப்படையில் மாநிலங்களை மறுசீரமைத்தல், அமைதியும் நீதியும் இணைந்த வெளியுறவுக் கொள்கையை உருவாக்குதல் ஆகிய சவால்களைப் புதிய தேசம் எதிர்கொண்டது.

8.1 பிரிவினையின் விளைவுகள்

• 1947 பிப்ரவரி 20: 1948 ஜூன் 30க்குள் இந்தியாவிற்குச் சுதந்திரம் அளித்துவிட்டு வெளியேறுவதாக அட்லி அறிவித்தார்.
• 1947 மார்ச் 22: வேவலுக்குப் பதிலாக மௌண்ட்பேட்டன் அரசப் பிரதிநிதியானார்.
• 1947 ஜூன் 3: மௌண்ட்பேட்டன் திட்டம்; சுதந்திர நாள் 1947 ஆகஸ்ட் 15 என முன்கொணரப்பட்டது; இடைவெளி வெறும் 72 நாட்கள்.
• 1947 ஜூன் 14: மீரட் காங்கிரஸ் கூட்டத்தில் திட்டம் ஏற்கப்பட்டது. பிரிவினையை எதிர்த்த காந்தியடிகளும் அதைத் தவிர்க்க முடியாது என ஏற்றார்.
• சர் சிரில் ராட்கிளிஃப்: 1947 ஜூலை 8இல் இந்தியா வந்து பஞ்சாப், வங்காளம் ஆகிய இரண்டு எல்லை ஆணையங்களுக்குத் தலைமை வகித்தார். ஒவ்வொன்றிலும் இரு முஸ்லிம், இரு இந்து நீதியரசர்கள். ஐந்து வார அவகாசம்; தவறுகள் நிறைந்த 1941 மக்கள்தொகைக் கணக்கெடுப்பு; அறிக்கை 1947 ஆகஸ்ட் 9.
• சுதந்திர தினம் கொண்டாடிய மக்களுக்குப் புதிய வரைபட விவரம் தெரிவிக்கப்படவில்லை. ராட்கிளிஃப் அறிவிப்பு பல முரண்பாடுகளைக் கொண்டிருந்தது. கிழக்குப் பாகிஸ்தான் 1971 டிசம்பரில் பங்களாதேஷ் ஆனது.
• 1947 ஆகஸ்ட் 15 அன்று காந்தியடிகள் புது தில்லிக்கு வெகுதொலைவில் உண்ணாவிரதம் இருந்தார்.
• அகதிகளின் நீண்ட வரிசை கஃபிலா; இரயில்கள் தாக்கப்பட்டன; 2 இலட்சம் முதல் 5 இலட்சம் பேர் உயிரிழந்தனர், 15 மில்லியன் பேர் இடம்பெயர்ந்தனர். செங்கோட்டை, புராணஹிலா கோட்டைகளில் முகாம்கள்.
• 1950 ஏப்ரல் 8: நேரு - லியாகத் அலி கான் தில்லி ஒப்பந்தம்.
• W.H. ஆடன் எழுதிய 'பிரிவினை' கவிதை ராட்கிளிஃபின் அவசரப் பணியை விவரிக்கிறது.

8.2 இந்திய அரசமைப்பு உருவாக்கம்

• இந்தியர்களே தங்கள் அரசமைப்பை உருவாக்க வேண்டும் என்ற கருத்து 1922லேயே காந்தியடிகளால் முன்வைக்கப்பட்டது; 1934இல் காங்கிரஸ் அதிகாரப்பூர்வமாகக் கோரியது; வெள்ளை அறிக்கை புறக்கணிக்கப்பட்டது.
• 1935 சட்டத்தின்படி 1946இல் மாகாணத் தேர்தல்கள்; மாகாணச் சட்டமன்றங்கள் அரசமைப்பு நிர்ணய சபையைத் தேர்ந்தெடுத்தன. முஸ்லிம் லீக் விலகியிருந்தது.
• டாக்டர் பி.ஆர். அம்பேத்கர் பம்பாயிலிருந்து தேர்ந்தெடுக்கப்பட்டு அரசமைப்பு வரைவுக் குழுவின் தலைவரானார்.
• கராச்சி கூட்டத்தின் (மார்ச் 1931) அடிப்படை உரிமைகள் தீர்மானம் அரசமைப்புக்கு அடிப்படையானது.
• முதல் கூட்டம்: 1946 டிசம்பர் 9; தலைவர் இராஜேந்திர பிரசாத். 1946 டிசம்பர் 13இல் நேரு குறிக்கோள் தீர்மானத்தை அறிமுகப்படுத்தினார்.
• அரசமைப்பு 1949 நவம்பர் 26இல் ஏற்கப்பட்டது. அடிப்படை உரிமைகள் குறிக்கோள் தீர்மானத்தின் ஐந்தாம் பிரிவிலிருந்து உருவாயின; சட்டமொழி 1948 டிசம்பர் 10 அனைத்துலக மனித உரிமைகள் பேரறிக்கையிலிருந்தும் பெறப்பட்டது.

8.3 சுதேச அரசுகளின் இணைப்பு

• 1947 ஆகஸ்ட் 15க்குள் காஷ்மீர், ஜுனாகத், ஹைதராபாத் தவிர மற்ற சுதேச அரசுகள் இணைப்புறுதி ஆவணத்தில் கையெழுத்திட்டு பாதுகாப்பு, வெளியுறவு, தகவல் தொடர்பில் இந்தியாவின் மைய ஆதிக்கத்தை ஏற்றன.
• அனைத்திந்திய மாநில மக்கள் மாநாடு (டிசம்பர் 1945, ஏப்ரல் 1947): அரசமைப்பு நிர்ணய சபையை மறுக்கும் மாநிலங்கள் எதிரியாகக் கருதப்படும் என எச்சரித்தது. மன்னர்களுக்குத் தாராளமான மன்னர் மானியங்கள் வழங்கப்பட்டன.
• இடைக்கால அமைச்சரவையில் உள்துறை அமைச்சரும் மாநில நிர்வாக அமைச்சருமான சர்தார் வல்லபாய் படேல் இணைப்பைத் திறம்பட முடித்தார்.
• மக்கள் இயக்கங்கள்: திருவாங்கூரில் திவான் சி.பி. இராமசாமியை எதிர்த்த புன்னப்புரா-வயலார் ஆயுதப் போராட்டம்; ஒடிசாவில் பிரஜா மண்டல், பழங்குடியினர் கிளர்ச்சிகள் (நீலகிரி, தெங்கனால், தல்சர்); மைசூர் மகாராஜாவிற்கு எதிரான காங்கிரஸ் போராட்டம்.
• ஹைதராபாத்: நிஜாம் விடுதலைப் பிரகடனம் செய்த 48 மணிநேரத்திற்குள் காவல்துறை நடவடிக்கை; இரசாக்கர்களுக்கு எதிரான தெலங்கானா மக்கள் இயக்கம் அதற்குச் சட்டப்பூர்வ காரணம் தந்தது.
• ஜுனாகத்: மக்கள் விருப்பத்திற்கு எதிராக அரசர் பாகிஸ்தானுடன் சேர விரும்பினார்.
• காஷ்மீர்: மகாராஜா ஹரிசிங் சுதந்திர அரசாக இருக்க விரும்பினார்; தேசிய மாநாடு 'காஷ்மீரைவிட்டு வெளியேறுங்கள்' போராட்டம் நடத்தியது. 1947 அக்டோபரில் பாகிஸ்தானியர் ஊடுருவிய பின் இணைப்புறுதி ஆவணத்தில் கையெழுத்திட்டார். உறுப்பு 370 தனி அந்தஸ்து வழங்கியது; 2019இல் நீக்கப்பட்டது.

8.4 மொழி அடிப்படையில் மாநிலங்களின் மறுசீரமைப்பு

அரசமைப்பு உறுப்பு 3 புதிய மாநிலங்களை உருவாக்கவும் எல்லைகளை மாற்றவும் நாடாளுமன்றத்திற்கு அதிகாரம் தருகிறது.

8.5 இந்திய வெளியுறவுக் கொள்கை

• சிற்பி: ஜவகர்லால் நேரு. கோட்பாடுகள்: காலனிய எதிர்ப்பு, ஏகாதிபத்திய எதிர்ப்பு, இனவெறி எதிர்ப்பு, அணிசேராமை, ஆப்பிரிக்க-ஆசிய ஒற்றுமை, ஆக்கிரமிக்காமை, தலையிடாமை, இறையாண்மையை மதித்தல், உலக அமைதி.
• சீன மக்கள் குடியரசை முதன்முதலில் அங்கீகரித்த நாடு இந்தியா (1950 ஜனவரி 1). 1950இல் சீனா திபெத்தை ஆக்கிரமித்தது.
• பஞ்சசீலக் கொள்கை (1954): நில எல்லை, இறையாண்மையை மதித்தல்; ஆக்கிரமிக்காமை; உள் நிகழ்வுகளில் தலையிடாமை; சமத்துவமும் பரஸ்பர பயனும்; சமாதான சகவாழ்வு.
• 1959: தலாய்லாமாவுக்குத் தஞ்சம்; அக்டோபர் 1959இல் லடாக்கின் கொங்காய் கணவாயில் சீனத் தாக்குதல். 1962 செப்டம்பர் 8: தக்லா மலைப் பகுதியில் சீனத் தாக்குதல்.
• ஆசிய உறவுகள் மாநாடு (மார்ச் 1947, 20க்கும் மேற்பட்ட நாடுகள்); கொழும்பு 1954; பாண்டுங் மாநாடு (ஏப்ரல் 1955) மற்றும் அதன் 10 அம்சப் பேரறிக்கை; பெல்கிரேடில் அணிசேரா இயக்கம் தோற்றம்.
• 1961: நேரு, நாசர், டிட்டோ அணுசக்தி ஆயுதக் குறைப்பு, சமாதானத்திற்கு அழைப்பு.